تعبت كتيــــــــــــر

..  بقلم د.ميرفت السيد 

لك انت .. 
خلاص إنسي... في زحمه الطريق تعبك 

بس لغيرك .. 
لو تعب .. ألف ايد  تطبطب بكل حب عليه !!

لك أنت.. 
قلب أيه..  بلاش تكبر الموضوع .. هو دة بختك و نصيبك و مكتوب 

بس لغيرك .. 
بيتعمل لقلبه خاطر  ومليوونً حساب !! 

لك انت .. 
أخدت الدنيا منك ..روحك وأحلامك .. و يوم كنت بتتمناه
 
بس لغيرك ..
عاوز دائما دنيته بتضحك مفيهاش ثانيه تعب و كلها احساس !! 

لك أنت.. 
ليه بتشكي ؟؟ ما أنت قلبك خلاص أتعود ع العذاب .. 

بس لغيرك 
عيش .. وأفرح.. عادي خالص .. 
و عود غيرك "ع .. المفيش .. حلمك مش مشروع و متشتكيش "!! 

لك أنت .. 
تسمع بس شعارات و هتافات ووعود في الصبر .. مع انه زي ما قالت الست له حدود 

بس لغيرك .. 
حاول و عافر  و ربك قادر بالدعاء يغير القدر و المكتوب !! 

لك أنت.. 
إنسي حلمك .. إنسي أملك اللي عيشت بتترجاه سنين 

بس لغيرك .. 
حلمه لازم يتحقق و المؤيدين كتيررر !! 

لك انت .. 
عيش في الحياة ع الهامش و الكفاف  .. عيش من غير مشاعر .. و كأنك جماد 

بس لغيرك 
اتمتع.. و الدنيا خد منها كل اللي نفسك فيه .. و بتتمناه !! 

لك أنت 
أيامك خلاص رايحة .. جربت الحياه  مرة .. حلوه و لا مره .. استني  الموت .. بإبتسام   

بس لغيرك 
الأيام أدامك .. و لو وقعت قوم تاني و حاول كتير .. دي الدنيا..و لازم تتعاش !! 

لك انت .. 
قلبك عضو عادي من اعضاء الانسان .. يموت وبيمرض .. 
وعادي يشوف العذاب 

بس لغيرك 
قلبك له حق عليك .. عيش حياتك و اتعلم تحلم  .. و تجري تحقق الاحلام !!

لك أنت.. 
أتعود خلاص ع العذاب .. بقيتوا أصحاب .. و عشرة سنين ما تتساب

بس لغيرك 
بعد الوجع .. ربك كريم .. و الأمل في بكرة هاتعيشه و ترتاح !! 

لك أنت.. 
صورتك أزاي يشوفها الناس .. عيب دة انت كده بتلفت الانظار 

بس لغيرك 
انشر  سعادتك في كل مكان .. سوشيال ميديا و سناب وجروبات !! 

ايه نوع البطوله اللي بيحسوا بيها لما الموجوع بيتعصر قلبه من الآلم جواه .. ؟؟ 
ايه الانجاز لمًا تخلي الدموع  في عيونهم مبتنتهيش ؟؟ و تصغر امنياتهم و كانها مفيش 

مع الاسف دة اللي احنا بنسمعه من ناس كتيررر .. 
في نفس المواقف  .. بتتلون الاراء .. وحسب المصالح  بيتغير الكلام 

طيب ممكن من فضلك سؤال ؟؟

انت بقي بتحس بايه لما بيوحشك انسان ؟؟ 
بتعرف تعبر  وتقول واحشني ..  و تفرح بالمه والاحباب ؟؟ 

قادر تشوف وشك في مرايه .. 
و انت بمليون وش و ضميرك مات ؟؟ .. 

عارف لما تشوف الناس مبسوطين .. تنسي انك جرحت ناس دموعها هي الونيس الوحيد !!

عارف تبقي مبسوط وفي وسط ناس كتيررر ؟؟ 
امال ليه هاين عليك اللي وحدته هي بس رفق الطريق ؟؟ 

عجبي و عجبي ع الانسان .. اللي انسانيته حسب الظروف و الاهواء .. !!
عجبي ع القلوب الحجر اللي من فيهاش احساس !!

عجبي علي ناس بتنام مبسوطة ... و ناس من بحور دموعها .. يومها بقي كله ليل .. ومش بتنام !!