فول وفلافل.. بقلم طه هيكل

**بجنيه فلافل محشية
ومعاها شوية طرشي جنان
وعشرين رغيف لو تسمح
ومعاهم قرطاس دقة كمان
بسرعة عشان أنا مستعجل
التورماي هايفوتني يامهران
ياللا قوام خلصني ياعمي
زود لي كام كبشة فول
وهات الباقي أشتري جورنان
وشوية زيت حار
فوقهم يفوقوا عم السكران
**مالك كده يا أخينا ماتصبر
أنت فاكرني إن
أنا سرحان
ده أنا واقف على
حيلي من بدري
دمست الفول وفتحت
لكم هذا الدكان
ليه عايز تمشي قبل الخلق
يكونشي على راسك ريشة
وعلى كتفك راسم نيشان
مستعجل شوف طعمجي غيري
تكونش فاكرني ابن السلطان
عاجبك تاخد دورك ماشي
مش عاجبك وريني عرض كتافك
ما كفاية جنان
صبحنا لوجع القلب يوماتي
والكل شادد حيله علي
الرحمة ياعالم ده أنا إنسان
طه هيكل