وحشتيني ياما..... بقلم السفير د. علاء البسيوني

اسمحيلى ياما من وقتك شوية.
أنسى جنبك حمل شاليه تقيل عليا.
الحمل ياما فوق كتافى هدنى.
زاد انيني والحزن ملانى وده مش شوية.
نفسى ارتمى فى حضنك الدافى
أشكى اليكى همى وأيام الاسية.
عايزك ياما زى عادتك تسمعينى
ولو بكيت ياما تمسحى دمعى وتستحملينى.
ياما بندهلك انتى بتسمعينى
ياما زادت قسوة الأيام عليا.
كل يوم بقى يشبه اليوم إللى عدى
الكلام بقى كلمتين مش مفهومين على دمعة شاردة.
حتى لون الدنيا باهت
والمعانى فى قلبى تاهت
والدموع لألأت جوا عنيا
خوفى ياما لتطول عليا الشدة ديا.
غيابك ياما طال عليا
سبتينى للهم والحزن يرج فيا.
والنوم طار من عيونى
وسهرت انكوى بنار الصحاب إللى جارت عليا.
مادرتيش ياما ماللى حاصل وانتى غايبة
حالى مال بعدك خلاص والدنيا سايبة.
شوفتى حتى ابن اللئيمة
بان والله وبقاله قيمه
الجبان لقى فرصة يتشطر عليا.
نفسى ترجعى تحنى عليا
وتفكرينى بأيام وجودك إللى كانت هنيا.
كنت قبل ماأخرج بسألك مش عايزة حاجة
لية دلوقتي ياما ساكته مش بتقولى حاجة.
بتمنى ياما فى يوم تجينى بالسلامة
يالى شيلتى عنى الهم والحزن ياما.
ركبتى قطر الذهاب وطال الطريق
وإنت كنتى ليا الأم والأب والصديق.
تاهت الفرحة يوم ماركبت قطر الفراق
وحشتنى الضمة والبوسة وحنان العناق.
نفسى تجينى ياما ولو شوية
ترجعيلى ياما زى زمان بهية .....