اللتا تة

********
خالتي اللتاته دي حدوتة 
فـ كل عيلة وكل بيت 
قاعدة للساقطة واللقطة
وودانها  بتعدي الحيط 

وبنت أختها فتنة بتتجوز 
فين ياختي كحكك وفطيرك ؟؟
أبو سمنة  وزيت................... ؟؟
جبتوا  كام كرسي للسفرة ؟؟
وفوط،ألوان حمرا وصفرا؟؟
وطقم سرير وردته خضرا
جبتوا  ملاقيط ؟؟

بنت أم سلامة اتخطبت ......
وعريسها داخل كدا خارج 
إيده فاضية ولا حبه توت
ولا حتى هدية ولو كانت 
دقة و لا سميط 
ياترى هيجهز كام أوضه
جابوا إبر الخيط؟ 

بنت أخت حماها  قامت
عركه مع جوزها ........
ماهو أصله.............. غتيت
من عيلة منعرفش أصولها
كانت قسمة......... تيييييت

وأخوها ومراته كمان والعه الدنيا 
بسببها ....عيشتهم لخابيط
بتشيل وتحط في ميت كلمة
لضماهم خيط
وتقولك وأنا مالي
خليني  في حالي
وهي............ بتزيط
                                                                   
خالتي اللتاته مش سايبة
حتى ......صرصار الغيط
تحكي وتتحاكى على سهره
ونقره ..... وتقول دا زيط
وشوية تقولك ..... دا يابخته 
هايص تخبيط

وأخينا جارها في السابع
اشترى كتاكيت
فياترى كام واحد دا عددهم 
وشاريهم  كاش ولا تقسيط ؟!

خالتي اللتاته مرضانةبلسانها 
ومرضانا من كتر العيط  
خالتي اللتاته دي لسانها
في حياتنا نعمله  غبيط
الرحمة ياخالة وسيبينا
عايشين من غير تخطيط
ولا قالوا وقلنا وعادولنا
قربنا نموت

وافتكري لسانك دا حصانك
راح تبكي فلتانه وتقولي ياريت
ياريت مانطقت ولا قلت
وشلت وحطيت...... كلمة 
كلمة واهي طلقة راحت صابت
وأنا فاكرة لا صبت ولا كويت
مش كلمة هي وهتعدي
حاسبي .... حاسبي 
هتتحاسبي في يوم لازم
وساعتها......أبدا  لاهينفع
جن....... ولا شغل العفاريت 
  
مايسة إمام إبراهيم