المشاعر مش حروف بقلم مصطفى سبتة

المشاعر مش حروف مترصصين
مش كلام من غير معانى محسوسين
مش لقا و مسكة إيدين
مش غناوى نقولها و احنا ف أى حته
مش يدوب وردايه فى عروة جاكته
المشاعر
يعنى وقت الشدة جنبى التقيك
يعنى من غير أى كلمة أحس بيك
يعنى بالنظره أضمك و أحتويك
يعنى عمرى ما أجرحك .. و أخاف عليك
المشاعر
يعنى حضنك يبقى دارى
يعنى عشقك ده قرارى
يعنى مهما الكل باعوا
لو بعمرى .. ابقى شارى
فى المشاعر
صدقونى صوت كلامك مش مهم
مش مهم تقول بحب
مش مهم تقول هويت
مش مهم تقول قصيده العشق
فيها الف بيت المهم
المهم تكون حاسسها فى الوريد
المهم تكون لامسها لو بعيد
المهم تكون حنين مش عنيد
تبقى شايف إن عشقك أحلى عيد
صدقونى
المشاعر لحظة صادقة مش نشيد
مهما لونتوا الكلام
و المشاعر منكوا ضاعت ف الزحام
أى شىء مهما تقولوه مش راح يفيد