المناديل والدولار

بقلم حماده عبد الجليل خشبة 

لحد الان فيه مواطنين ميعرفوش يعني ايه تعويم للجنيه احنا هنا مع بعض هنوضح يعني ايه تعويم، بالبلدي كده يعني انت عندك محل وبتبيع أي حاجة ولنفترض بتبيع مثلا مناديل،  بتشتري علبة المناديل دي ب 60 قرش وبتبيع علبة المناديل دي بجنيه وماشية معاك حلو وعلبة المنادبل محافظة على قيمتها وماشية في السوق حلو أوي والناس بتحب تشتري النوع ده منك.....

شوية شوية وحصل إن فيه محل فتح جنبك بيبيع مناديل جديدة ونوع جديد وبدأ يبيعه بسعر أقل منك علبة المناديل بقى بيبيعها ب 40 قرش بدل جنيه....

شوية شوية الدنيا هديت عندك ومبقتش تبيع زي الأول..  هتضطر إن أول قرار ليك يكون انك تنزل سعر علبة المناديل دي وتبيعها ب 70 قرش مثلا عشان تقرب لسعر المحل اللي جنبك وعشان تقدر تنافسه وتحاول ترجع مبيعاتك زي الأول.. كده نسبة ربحك قلت وبقى عليك ضغط أكبر.

بعد فترة الضغط عليك هيزيد، وانت كواحد معندكش أي بديل تاني هتضطر بعد فترة تنزل السعر ل 50 قرش وشوية ممكن تنزله ل 40 قرش عشان تبين انك قادر تنافس وعشان تبين للناس انك لسه عايش وان محلك مابيخسرش والدنيا فل معاك. 

بس في الحقيقة انت بتخسر فعليا كل يوم وعارف ان هييجي عليك وقت وتفلس وتقفل المحل وعندك جوه كوم مناديل مش عارف تبيعها، ودا ان شاء الله مش هيحصل علشان بفضل ربنا عندنا اللي يغطي وزيادة، ويمكن الناس شايفة انك عمال تنزل سعرها بسرعة في فترة قليلة وبالتالي ده خلاهم يقولوا ان أكيد مناديلك قيمتها قلت واكيد مابقتش حلوة، بس ربنا حافظ البلد دي وعمرها مهتفلس  بس انت قول يارب.

الخوف خلى الناس ماتشتريش منك اصلا وماشيين بمناديل المحل التاني... وبالتالي مبقاش ليك قيمة دلوقتي.. 
آخر قرار هتفكر فيه عشان تمشي نفسك وتلحق نفسك من الموت...  هتعوم المناديل دي.....

يعني ايه نعوم المناديل؟ 

يعني مش هتحددلها سعر ومش هتبيعها بسعر معين...  لو حد دخل هتقوله عايز علبة المناديل دي بكام؟ 

هيقدرها هو بنفسه..  وهتسيبه يقدرها لأنك عايزه يشتري بأي سعر... 

هيقولك 10 قروش..  هتقوله مبروك عليك .. 

واحد غيره هيدخلك يقولك هشتريها ب 50 قرش...  هتقوله حلال عليك... 

واحد غيره هيقولك اشتريها بجنيه...  هتقوله الله عليك...  

وتقعد انت مع نفسك كده تحاول تحط من ده على ده عشلن تحاول تعوض خسارتك وتعرف تبيع أكتر وتحاول ترجع مبيعاتك زي الأول.....

اهو ده بالظبط موقف البنك المركزي..  واضح انه وصل للمرحلة الأخيرة والقرار الأخير اللي لازم ياخده عشان يحاول ينقذ الموقف وهو قرار تعويم الجنيه للمره الثالثه حسب ارتفاع سعر الفائدة للبنك الفيدرالي الأمريكي وتعويم الجنيه يعني البنك المركزي والدولة ترفع ايديها عن تسعير عملتها ويبقى سعر عملتها حر حسب العرض والطلب... وكل ده في سبيل حاجة واحدة..  انه يزود الصادرات ويقدر يجيب عملة صعبة ويسد العجز..

بس معروفة اقتصاديا وعالميا إن بعد أي قرار لتعويم العملة..  فيه  احتمال ان الصادرات تزيد..  بس أكيد إن الواردات هتقل بسبب إنك عشان تشتري عملة صعبة هتدفع كتير جدا لأن عملتك هتبقى ملهاش تمن أصلا وده في حد ذاته هيبقى كارثة بكل المقاييس على كل فئات الشعب سواء مستورد كبير أو مستهلك غلبان هتوصله الحاجة بسعر خيالي مبالغ فيه.. لكن في اجتماع مجلس الوزراء الذي اعطي مهلة للتجار وأصحاب المصانع وضع تسعيره معلنه على كل سلعه استراتيجية تمس المواطن اليوميه وقال أيضا ان هيتم التنسيق مع اتحادات الغرف التجاريه والصناعات على تسعير بعض السلع الاساسيه.

يعني من الاخر مفيش سعر محدد للجنيه..  اللي هيحدد سعره هو اقتصاد البلد والحركة التجارية وحركة الصادرات واللي ان شاء الله هتزيد في الفتره القادمة خصوصا بعد اكتشاف حقول أخرى للغاز الطبيعي. 

لو كان معاك أي مبلغ ماديه كنت اشتري بجزء منها  دهب زي ما الدولة اشترت ب ٤٤ طن من الذهب قبل أزمة روسيا واكورانيا او فكر تستثمره في أي حاجة غير إنك تسيبه جنيهات ورق. 

 متخليش معاك فلوس سايبة كتير وحطها في أي أصول عشان تضمن ان قيمتها ماتقلش على الأقل لحد ما يبان ملامح لأي حاجة بخصوص العملة والاقتصاد...

معلش حبيت اشبه الجنيه بالمناديل علشان نعرف كلنا يعني ايه تعويم. 

وان شاء الله مصر محفوظه بفضل ربنا
حفظ الله مصر شعبا وقيادة