بقلم.. محمود جنـــيدى ..بلاش تبقى إمّعة

من فضلك بطّل انت وهو وكفاية جعجعة ..
متسمعش كلام الناس الغاوية بس فرقعة ..
سيبك من الكلامنجى أبو دماغ مشعشعة ..
سيبك من اللى م فاهم ونازل فيها برطعة ..
إنزل وشارك وقول وبلاش تبقى إمّعة ..
* * * * *
إنزل واختار إنشالله حتى تبطل صوتك ..
مصر محتاجة لكل جهدك مش سكوتك ..
مصر لازم تعيش لو التمن موتى موتك ..
* * * * * *
المشاركة شئ حضارى مش إحجامك ..
بترفع شأنك وتجبر العالم على احترامك ..
حتقدر تقول كلمتك والكل حيقدّر كلامك ..
* * * * * *
خلينا نقول اننا إيد واحدة فى حب مصر ..
ونحارب الإرهاب كلنا ونجيب النّصر ..
واللى يقع شهيد حيلاقيله فى الجنة قصر ..
فانزل انت وهو كلنا ننزل فى حب مصر ..
ونقف نحيّى العلم ونتقول " تحيا مصر "