" حكــــاية الجمــــــــل والحمـــــــــــــــل "

للشاعر ــ الدكتور " محمد سيد الدمشاوي "

من ديوان ( حكــــــــــاوي زمــــــــــــــــــــان )

قال الجمل للحمـــــل : مــــالك كده مهموم

واكل وشارب وطول عمـرك كما المسموم

قال الحمــل للجمـــل : مـــا يغـــرك المنظــر

الأكل مش للسعادة ، دا أكل عشـــــان اكبر

وفى يوم يجيب الملك جزاره يدبحني

ويخــلى لحمى غذا للناس ، وللمــــنظر

قال الجمل للحمــل: اصبر ياشيخ اصبر

وارضى بقضــاء ربنا المكتوب ومتقدّر

قال الحمل للجمــل والصبر اجيبــه منين

أنا كل يوم ياجمـل باحلم ف ايديــه سكين

وف كل يوم بانتظر موتى وأنا صاحي

مــرة يقولوا فــرح ، أو يطلبوا أضـاحى

طب بص حـالى ، وقلى كيف أكون مرتاح

وانا اللى عايش لأجل الموت مسـا وصباح

قال الجمل للحمل أهو كلنـــا ف دا الحال

الموت علينا اتكتب ، والهم ليله طال

تعرف يا واد يا حمل، أنا باحسدك على طول

وبقول دا واد مكتوباله الدنيا عـرض وطـول

فى العيد تلاقى الجميع فرحان سعيد جنبك

إن كـان كبير أو صُغيَّر ، كله بيحبـك

إيه يعنى لما تضحى والجميع عارف

قيمتك وخيرك وضلك ع الجميع وارف

انا يا ابنى شفت العذاب م الناس هنا ألوان

أشيل يوماتي الحمول ، وأبات حزين وجعان

صحبى بخيـل مقتــدر، وبيعبـد الأمــوال

ما ف يوم عطانى عشا ، ولا يوم سأل عن حال

وان يوم شكيت ينفعل ، ويقوم ويضربنى

ويقــولي أصلك غبى ، عايز تجنني

واحنا ف قانونا ـ الجمل يصبر على الجمَّال

إن كان من الأوليا ،أو كان من الأندال

أبات دموعى لهب يا كل فى أحشائى

والصبر منى غلب ، وبينضرب أمثال

قال الحمـل للجمـل ، مـش عارف أقولك إيه

وأنا اللي كنت احسدك على اللى انت عايش فيه

دايما با شوفك جمل ، مرتاح ومتغنضر

إللي يشوف بلوته ، بلوة أخوه أكبر