خطوات بتدوس على الارض كأنها بتهرب من حاجه جواها

بقلم/نشأت البسيوني 

في لحظه غريبه كده بنصحى على احساس ان في حمل تقيل ساكن جوانا حاجه مش مفهومه ولا ليها شكل بس بتشد روحنا لتحت وكأنها بتفكرنا بكل اللي فات وبكل اللي كسرنا من غير ما ناخد بالنا ويمكن من غير حتى ما نقول احنا تعبنا ولا لاء ونقوم نمشي في اليوم من غير مزاج ومن غير صوت وكل خطوه نحس انها بتخبي وراها قصه مليانه حاجات احنا مش عايزين نفتكرها خوفا من 

نفسنا قبل ما يكون خوفا من الناس وبنقابل ناس شكلهم عادي بس كلماتهم بتدخل لعمق مش بنبينه لحد كلمات تصحي وجع وتدفن وجع تاني ومواقف بسيطه تفوقنا على حقيقتنا اللي بنهرب منها لسنين وفي وسط كل ده بنسأل سؤال محدش بيعرف يجاوب عليه ليه بنكبر فجأه في يوم واحد كأن الايام اكلت عمرنا واحنا مش واخدين بالنا ومع الجري ده كله بنكتشف ان الارض اللي بنتحرك 

عليها مش بس طريق لكن شاهد على كل حاجه عدينا عليها على خوف وقفنا بسببه على كسر خفناه على حلم وقع من ايدينا وعلى لحظه نور لما حد مد ايده ورجع روحنا للحياه تاني وساعتها نحس ان الدنيا رغم قسوتها لسه فيها نفس بسيط يقدر يداوي جرح كبير لو لقينا اللي يفهمه بس الحقيقه ان مشكلتنا مش في الناس مش في الزمن مش في المواقف مش في الاوجاع مش في الخساره 

الحقيقه ان مشكلتنا ان احنا بندي قلوبنا اكتر من اللي تستحقه اللحظه وبنعشم نفسنا ان كل حد يدخل حياتنا هيفضل فيها وبنبني امال على ناس ماقدرتش وجودنا ولا تعبت عشان تحافظ علينا
وبرغم كده نرجع نقوم نكمل وبنفس القلب وبنفس الروح اللي اتأذت كذا مره وبنفس الاحلام اللي ما زالت بتعافر عشان تتولد من تاني لان جوه كل واحد فينا نقطه نور صغيره بتقول ماتستسلمش 

مهما اتطفى حواليك ناس كتير النقطه دي هي اللي بتفكرنا ان احنا مش ضعاف زي ما بنفتكر وان الجرح اللي جوانا مهما طال عمره مش معناه نهايه الحياه بالعكس ده معنى بدايه جديده ومع مرور الايام نلاقي ان الخطوات اللي كانت بتجري هربانه بقت بتجري راجعه لنفسها راجعه لقلبها راجعه للهدوء اللي فقدته راجعه للسلام اللي طول عمرها محتاجاه راجعه لقيمتها اللي ماحدش عرف 

يشوفها راجعه لقوتها اللي ماحدش قدر يكسرها مهما حاول
ووقتها نفهم ان الطريق ماكانش هروب الطريق كان رجوع واصعب رجوع هو الرجوع للنفس لان النفس لو رضيت صلح كل شيء ولو ارتاحت هدي كل شيء ولو وقفت بجد قدام الدنيا الدنيا هتعرف ان مهما كانت قاسيه الانسان اللي قام من كسره عمره ما يقع تاني