(ريشي )خواطر مايسة ابراهيم

ريشي 
*********
نتفوا ريشي و قصقصوه
فاكرين  عمري نقصوه
يوم ماداسوا ع الكرامة
خنقوا الحق أوام داسوه
لبسوني الحمرا  زور
قالوا راضع م ديابا
مفطوم على كل الشرور
قالوا حكم العدل إنه
يموت ذليل كدا مكسور 
دقي كمان يامطرقة
ياأم ودان مطقطقة
للكدب دايما متعودة 
وبدقتك أصبح منحور
الميزان معيوب  ياناس
مكسور أصله م الأساس
واللي بيكيل عليه
واخد توكيل الخناس 
أعمى شايف كل حاجة
عامل فيها من الحراس
حامي حمى ديار الغلابة
هو الراية والنبراس
لابس وش الطيبة خيبة
وميعرفش إنه نسناس
فقرة سيرك طالع يعملها
دوره يخلص وهينداس
لما جم ونتفوا ريشي
كانوا فاكرين إن خلاص
هي قصة عادية وعدت
تايه منهم الاحساس 
بكره الحق عند الحق
صوته عالي كله حماس 
بكره ريشي ينبت تاني
واطير به في الجنة ياناس 
************************
 مايسة إمام إبراهيم