قبل ما اتكلم معاه بقلم مصطفى سبتة

الكلام جواي بيوصل منتهاه
ولما اسمع صوته القا
الكلام ضاع مني فجأة
وببقى متلخبط ساعتها
واحس إن انا عقلي تاه
فين الكلام اللي عايز اقوله
واللي بحضر فيه واجمع
اليوم بطوله
فين بحبك فين واحشني
يعني قدامه يموتوا
ويجننوني من وراه
يمكن عشان من شوقي ليه
ببقى مش عارف اقول
واحكي في ايه
ببقى مش لاقي الكلام
اللي بيه ممكن اعبر عن
كل شيء عايشه فى هواه
عايز اقول له إني بحبه
وان أجمل وقت بيعدي
عليا لما ابقى جنبه
واني ندمان عاللي فات
واني بتمنى اللي جاي
يتعاش معاه