كتبت.ياسمين حافظ. اعقلها وتوكل..

"الانتظار" أصعب حاجة في الدنيا هو التفكير في الانتظار ، انك تنتظر شيء يتعملك او فعل او حدث يحصلك او انك تنتظر انسان يحبك ولا يتجوزك ولا يجيلك ولا يسأل عليك ولا يطبطب عليك ويواسيك ولا وعدك بأي حاجة هيعملهالك ولا ولا حاجات كتيرة ممكن كلنا ننتظرها ، ودايما اللي بيكون اكثر ألما من الانتظار هو الطرف التاني اللي اتعشم في الطرف الاولاني سواء بقي قاله " هعملك كذا ،هشغلك شغلانة ، هحبك وهتجوزك ، هدافع عنك ، هجيبلك حقك ، هفرحك قريب، هفسحك ، هجيبلك هدية ، ها وها وها وها " والاكيد الطرف الاولاني في شعوره مش متالم وتعبان في التفكير زي التاني في أحوال كتير ، ده حتي الطفل ياخوانا لو وعدته بانك هتخرجه ولا هتجيبله لعبة بيفضل قاعد مستنيك ومنتظرك وبيتعب من التفكير في ياتري هيجيبلي ايه ياتري هيفسحني فين وعشان كده لازم ناخد بالنا كويس واحنا بنوعد اطفالنا اننا نكون اد الوعد ده ، وكمان لما نوعد أي حد لازم نكون اد الوعد ده ولازم نحس بالطرف التاني ده اوي في الم انتظاره ونراعيه وخير مثال ع الانتظار بكل اشكاله بعض العبارات الشهيرة التي أدت الي أمراض نفسية مستعصية كثيرة في مجتمعنا " هنفرح بيكي امتي ، انتي لسه مخلفتيش ، يلا شد حيلك عايزين نشيل عيالك يا أخي ، هتشتغل امتي هتفضل عاطل كده ، مش هتجيبي بيبي تاني تخاويه ، انتوا لسه معزلتوش ، وغيره وغيره" ... كل دي عبارات شهيرة في مجتمعنا عقدت ناس كتيرة في حياتها بسبب انتظار الناس للحاجات دي منهم وبسبب ان هما نفسهم منتظرين الحاجات دي بس لسه نصيبهم مجاش والنصيب ده بيد الله طالما بيعملوا اللي عليهم هيعملوا ايه تاني بقي ياناس والناس دول مش بيحسوا ولا بيراعوا الم انتظار اللي بيسالوهم كل شوية ويجرحوهم ... خلاصة الكلام اوعي تنتظر اي حاجة اي شىء اي فعل اي حدث اي انسان سيبها ع ربنا متحسبهاش حسابات ربنا احلي واجمل اعمل اللي عليك وزيادة وانسي انسي ومتنتظرش انتظار ربنا احلي واعظم وانتظار ربنا لازم تكون مستعد له كويس اوي باعمالك و نواياك واحوالك اللي يكون فيها ربنا راضي عنك ، الانتظار مؤلم في التفكير في اي شىء فخير الامور تكون بين العاقل والمعقول ..." اعقلها وتوكل ".