لله يامحسنين لله 

*************
لله يامحسنين لله
لله حبه كرامة
لله  حبه حيا
كرامة  صدامة
بتقول الف اه
عاملاها   مداس
تدوسها الناس
وايه يعني...... المهم
صوتي يوصل صداه
الَحَّن واقَسِّم
ولْمِيت كلمة بَلْضُم 
ياأصحاب الإنسانية
فاقدة عيني  ونظري
وعيالي تسرح وتهري
في كدب وحكاوي
اللي راح واللي تاه 
والناس تتصعب وتبكي
وتقول مسكينة بتشكي
حتى الكافر يدمع  
من قسوة الحياة
هتشخلل في   جيوبك 
عمري ماهشوف عيوبك 
وعيني ماتسيبك
داأنا صقر راصد فريسته
بقوة و بجاه 
ملكة أنا في مكاني
ولا حد يقرب مكاني
نظام  وماشي سيفه 
ع الكل وعلى كيفه 
ومين يخالف هواه 
أحرق جِتَّه واشَوِّه
وأخطف عيل وأَمَوِّه
وتبقى الحوجة غنوه 
والذل يامحلاه 
بفلوسكو أنا أغنى منكو
وانتو الفقر محاوطكو
والنعره فيكو  بتكدب
قال عامله هيبة  وجاه
بجيوبكو  هابني قصور
وأنتوا ماليكو السرور
فاكرين صحاب الفضل
والفضل بعيد مداه 
لله يامحسنين  
يااللي متغميين 
شايفين ومش شايفين
عارفين ومش عارفين 
حقيقة وواضحة 
كشفها الإله
في جبيني علامة
خِتم  ليوم القيامة
هتحكي تاريخي 
واه ...آه منه اه
لكن....... مش مهم
عَيِّشْنِي اليوم ياعم 
اتمتع بمالي
ولما تيجي ساعتي
ابقوا ادفنوني معاه 
لله يامحسنين لله 
لله يامغفلين لله
***************
مايسة إمام إبراهيم