هبه خاطر : الديكور حلم حياتي و هدفي براند باسمي ..بالصور

هبه خاطر : الديكور حلم حياتي و هدفي براند باسمي ..بالصور

حوار /مصطفى العطار 

هبه خاطر مهندسه ديكور مميزة بسيطة و هادئة و تحمل الكثير من الاحلام العريضة و باحثة دائمة عن الافضل ، خريجة فنون جميلة جامعة حلوان حلمها براند باسمها و جاليري خاص بيها يعرض كل اعمالها و تحقق الانتشار و التميز الذي يحلم به كل صناع الهاندميد ، بعد نجاحها في اعمال الديكور قررت الانضمام لمبادرة الست المصرية برعاية مؤسستها رحيمة الشريف لتتعلم صناعة الصابون و مستحضرات التجميل .. 
تقول المهندسة هبه خاطر :
باحب الشغل اليدوى جدا بطبيعه شغلى في اعمال الديكور باعمل حاجات كتير نجف وترابيزات وستائر بالخيش باعمل ديكورات شاليهات وكمان باعمل حلويات وتورت تحفه ..

و استطردت متحدثة عن فن الديكور :
الديكور ده حلم حياتى من صغرى باعشق الالوان باعشق التنسيق والصورة الحلوه وبحب التغيير وبأقل الخامات ممكن اغير واجدد في الديكور اللى حواليك يعنى عملت ستائر من الخيش محدش يتوقع ستارة من الخيش والقواقع نحطها فى الساحل مكان الستارة التقليديه عملت ساعه من طبق نحاس وعملت نجفه كمان من طبق نحاس عملت اباجورة من القواقع و مازال عندي الكثير من الأفكار و الاحلام 

و عن علاقتها بمستحضرات التجميل اضافت
علاقتى بالتجميل زى اى واحدة ست بتحب الحاجات دى جدا و صرفت فلوس كتير عليها لكن وجدت انها دون المستوى اللي انا عايزاه ومن وقتها قررت انى اتعلم اعمل الحاجات دى و تكون بالمستوى اللائق و المميز و عن نفسى لما باقرر اعمل حاجه باوصل لها الحمد لله
و ذكرت :
عملت صابونه حليب الماعز وصابون جلسرين وصابون الفحم النشط وصابونه المورينجا وصابونه البيبى شاور وبلسم بزيت الجزر وحمام كريم بالنخاع وشامبو ومخمريه وهاند سوب وليب بالم ومزيل عرق ولوشن بار وصابون مغربى
و اختتمت قائلة :
باشكر الرائعه رحيمة الشريف جدا لمساعدتنا فى ظهور انتاج بالشكل دة و اعطتنا حماس وكانت واثقه فينا اننا هنوصل وهنعمل حاجه وبشكر المدرب مستر محمد عوده جدا على كرمه معانا و صبره علينا و تشجيعه الدائم
وبقول لكل ست مصريه انزلى اتعلمى هتفيدى نفسك و ولادك و بلادك