واخد ع الوجــع

محمد عبد المنعم

انا اصلى واخد ع الوجع بينى وبينه اتفاق

تقدر تقول اني جدع ممكن يكون مني غباء

وكأني بخاف م الفرحة لا ف يوم تدق بابي

وبانام ع حزني وباصحى والفرح مش ف حسابي

من كتر ما دقت اذية من ناس كانوا عزاز

احساسي اني ماليش دية كسرني بامتياز

وشيلت من حساباتي

ومسحت من حياتي

حاجات تافهة باعيشها بيسموها اشتياق

مش غاوى حزن اكيد ولا بالجراح باتسلى

وازاي هاكون سعيد دا الجرح ف قلبي ما خلا

وكأن كل سنيني شجرة بتطرح احزان

اهرب منها تلاقيني موجودة ف كل مكان

انا خدت خلاص كفايتي ولا دي مالهاش اخر

واتحملت فوق طاقتي ومهما ابعد واتاخر

احزاني تحن ليا

مخلصة ليا وفية

أشمعنى ف الجراح بس عندك وفاء