كيف نتعامل مع أطفالنا ونعدل سلوكهم

تكتب//أميرة محروس

علشان علاقتك مع طفلك تصبح وتتحسن كل يوم عن اليوم اللي قبله

هتكوني محتاجه تدركى مل هى أسباب سلوكه الغير مقبول. وكيفية تغير هذا السلوك , بس في حاجة لازم تعرفيها الأول, إن تربية الأطفال مش موقف ولا تجربة مره وتزهقي وتقولي مفيش حاجة بتجيب فايدة, لأن دا مش صح, تربية طفل يعني استمرار على نفس اسلوب التربية والتقويم لحد ما يتعود على الصح ويفهمه, كل لحظة في حياة الطفل بتكون فارقة في طريقة معاملتك معاه وهتأثر في تكوين شخصيتة الأساسية

1- لو طفلك بيكذب, هتحتاجي تديله الأمان وتكلميه عن الصدق وأفضل طريقة لتوصيل المعلومة هي الحواديت, أهم حاجة متخوفيهوش وتحاسبيه على كل كبيرة وصغيرة, لأن الطفل مش هيكذب غير لو حس انه مضغوط عليه من ناحيتك أو مش حاسس بالأمان.

2- لو طفلك بيعاند, متعانديش معاه لأن دا هيزود العند جواه وهيحسسه بالتحدي, متتحديش طفلك, واتعاملي مع السلوك دا بالتفاهم والحب والاحضان وهتلاقي سلوكه بيتغير.

3- لو طفلك بيضرب اخواته, يبقى حاولي متميزيش بينهم وتحسسيه إن حد منهم أحسن من حد, ولاحظي طريقة تصرفك معاهم وراعي إنك تكوني بتعامليهم بعدل, وهتلاقي مقالة كاملة اتكلمنا فيها عن تأهيل الأطفال للتعامل مع اخواتهم الأصغر.

4- لو طفلك بيمص صباعه أو بيكسر ضوافره, هيبقى خايف من حاجة ومحتاج تحسسيه بالأمان وتعرفي إيه مخوفه, وتطمنيه إن مفيش حاجة ممكن تأذيه وانتي معاه, ومتحاوليش تقارنيه بحد تاني لأنه ممكن يكون أحساس بالتوتر والتهديد وعدم التقدير للذات نتيجة المقارنة.

5- لو ابنك بيتعصب بسرعة على كل حاجة, خديه بهدوء اغسليله ايديه ووشه, وفهميه إن مفيش أي كلام وتفاهم في وقت العصبيه, وعلميه يطلب الحاجة اللي عايزها بهدوء, واتكلمنا قبل كده في طرق التعامل مع الأطفال في الوقت دا.

6- لو طفلك شخصيته ضعيفة حسسيه إنه مهم واطلبي منه مساعدات في أي حاجة مناسبه لسنه, وامدحيه كتير واشكريه على كل حاجة يعملها, قولي اسلوبه الكويس ومساعداته ليكي قدام الناس وحسسيه إنك فخورة بيه, واشتركيله في ألعاب جماعية في النادي.

7- لو طفلك بيقول ألفاظ مش مقبولة, عيدي النظر في الناس اللي حواليه واعرفي اكتسب الألفاظ دي منين, وفهميه بالراحه إن دا مش مقبول وشجعيه على إن يكون لسانه نظيف زي قلبه وحسسيه بأهمية نقاء القلب واللسان.

قبل كل دا بنقولك تاني, خلي بالك من التعامل مع الطفل بعصبيه وضرب وتهديد وتخويف, ومتمسعيش لكلام حد يحبطك ويقولك "مش هتقدري تعدلي سلوكه, ومفيش فايده, أو إن الأطفال هما اللي بيربوا الكبار مش الكبار هما اللي بيربوهم", لأن كل الكلام دا غلط وهيحسسك انتي باليأس وهتضطري تسيبي أطفالك زي ما هما بسلوكيات مش مقبوله وتبقى الحجه إن الناس اللي حواليكي وصلتك لكده, أطفالك مسئوليتك انتي ابتعدى عن المحبطين.