أبويا جاني في المنام بقلم مصطفى سبتة

أبويا جاني في المنام
بقلم مصطفى سبتة
جاني ابويا في المنام
اتفرد جنبي أبوياونام
قالي فينك يابن ضهري
حتي مستخسر زيارة
قلتله في الدنيا يابا
قالي دنيتكم خسارة
قلتله مطحون يابويا في الرحايا
بجري جري الوحش فيها
من صباحي ولمساية
قاللي يابني عيش حياتك
ارض ربك وارض ذاتك
قاللي اسألني انا
مش هينفعك الا عملك
اعمل الصالح تملي
زكي يابني
صوم وصلي
خلي حسناتك تعلي
خلي ذكر الله تملي فوق لسانك
ادعي يابني في كل لحظة
مش عشاني لأ عشانك
ده الدعا هيعلي شانك
ما تلمس ايدك حرام
ولا يدخل جيبك حرام
بالحرام يابني بتضيق القبور
قلتله ويش حاله قبرك؟
قاللي يابني كله نور
قد ايه ربك رحيم
قد ايه ربك غفور
خلي يابني البال من امك
زيها مايشلش همك
في رضاها السعد يابني
مهما تعلي ولا تبني
خلي بالك من ولادك
هما دول مالك و زادك
هما دولة امتدادك
قلتله نفسي اجيلك
قالي كل شئ يابني بأوان
كل واحد له أوانه
بالمكان وبالزمان
قمت بايسه فوق جبينه
ولمست بشوق عيونه
وصحيت م النوم بفرحة
شفت ابويا في المنام
من حلاوة الحلم نفسي
كل مااقوم تاني انام