المطبخ تقدمة صابرين متولى : التونه زي الجاهزه بالظبط...مقدمه من مطبخ الشيف ايمان حمدى

( ام مودى..لان فيه ناس كتير فى شم النسيم مابيكلوش الرنجة ولا الفسيخ...ولكن بيحبو التونه...جربوها هاتعجبكم

أنهارده هقولكوا على وصفه للتونه الجاهزه اللى بنشتريها من السوبر ماركت فى علب بس المره دى انا عملتها فى البيت وطلعت هايله

المقادير

سمكه تونه من السوبر ماركت فى ناس بتتلغبط بينها وبين المكاريل وممكن توصي عليها السماك يجيبهالك

طبعا هنغسل السمكه كويس بعد تنظيفها وأحاول اشيل شوكة الظهر واخليها وهقطعها طرنشات كبيره ولو الحجم مش كبير وهى لونها بيبقي زى لون اللحمه غامق كده بس ما تقلقيش من اللون بعد السليق بتفتح خالص .

وطبعا تبلتها بالثوم والليمون وكمون وملح وفلفل وتسيبيها شويه في التتبيله

حضري حله علي النار وحطي فيها ميه واعصري حوالي اربع لمونات عليها وحطى كمون وبصل متخرط كبير ومعلقتين خل واول اما يغلوا حطي السمك اللي انتي متبلاه

غطيها وسيبيها حوالي ساعه وماتقلقيش المده مش كبيره سمك التونه بياخد وقت شويه غير باقي الانواع التانيه اول اما بتحطيها بتجمد وبعدين مع الوقت بتستوي زي اللحمه بالظبط

وبعدين نطفىء النار ونصفيها فى مصفه ونصفيها من الميه هتلاقى لونها افتح خالص وبقي جميل زي الجاهزه

وبعدين أعمل الصوص بتاعها اللي هتتحط فيه

عباره عن رأس ثوم وأدقها بملح وكمون ---- وحوالى نصف كوب زيت ---- وربع كوب خل ---- عصير ثلاث ليمونات

وأضع كل مقادير الصوص على النار وأضع فيها فصوص السمك وأتركها تغلى مدة عشر دقائق لتتشرب جزء من الصوص وبس كده سيبيها بقى تبرد خالص وحطيها في برطمان محكم الغلق وحطيها في التلاجه ولازم الصوص يكون مغطيها خدي بالك

...ولو الصوص قليل أزود شوية زيت على وجهه للحفظ .

ممكن تحطي فلفل حراق حسب الرغبه مدقوقه مع الثوم للى بيحب التونه الحاره وشوية طحينه ورغيف وبصله والف هنا وشفا علي قلوبكم ...بجد روعه و جميله جدا ...

أهى تنفع فى الثلاجه عشاء أو غداء فى يوم تكسلى تطبخى تسحبى منها ..

ودي طريقه للتونه من السمك المكاريل من السمك المكاريل

فيه طريقة حلوة أوى لعمل التونة من سمك الماكريل لأن التونة غالى عارفين الماكريل بيبقى جلده ناعم وضهره أزرق وبطنه أبيض فضى...

الطريقة بعد تنضييف السمك وإخلاءه من الشوك بيوضع فى صينيه على نار هاديه ويوضع عليه نص كوب زيت ونص كوب خل وربع كوب عصير لمون ونص ملعقة ملح وكمون

وتترك نص ساعة بس على نار هاديه ..وبعد ين تُقطع وتوضع فى برطمان وتكون مغطاة بالسائل وتبقى بالتلاجة

والف هنا وشفا