المطبخ تقدمة صابرين متولى : دجاج البوب كورن ..للشيف حسن نافع

وصفتنا اليوم جميله وسهله (( دجاج البوب كورن)) كل اطفالنا بيحبوها لكن بنخاف عليهم لما نشتريها من بره عشان الزيوت المهدرجه اللى بتتقلى فيها فى محلات الفاست فووود وعشان كده هنعملها فى البيت بطريقه سهله جدا

المقادير

نصف كيلو صدور دجاج مقطعه مكعبات

هنحتاج بقا

1/2 كوب كبير دقيق عادى

1/2 كوب دقيق زره

1 معلقه صغيره ثوم بودره

1 معلقه صغيره بصل بودره

1 معلقه صغيره كارى بودره

1 معلقه كبيره زعتر بودره

1 معلقه كبيره نشا

1 معلقه كبيره بابريكا بودره

ملح وفلفل اسود

1 معلقه صغيره بصل مجفف ولو مفيش مش مشكله

1 معلقه صغيره بقدونس مجفف

الطريقه

هتقلبى كل ده على الدقيق الابيض ودقيق الذره وبعدين تقسمى الخليط ده على نصين نص منهم هتديله مايه وتقلبيه لحد مايكون فى قوام البشاميل بظبط وتتركيه على جنب والنص التانى زى ماهو هتسخنى الزيت كويس جدا ويكون غزير يعنى عايزه يغطى الفراخ وانتى بتقليها وبعدين هترشى قطع الفراخ بالملح والفلفل وتحطيها فى العجينه ومن العجينه على الدقيق ومن الدقيق على الزيت للقلى لحد ماتاخد اللون الدهبى الجميل ده وبالهنا والشفا