انا ابن مصر انت مين شعر لعيد صالح

انا ابن مصر انت مين شعر لعيد صالح

كنت مرة ماشى فى وسط الطريق

قبلت طفل .طفل كان باين علية انه برىء

ماشى لوحده كان بيبحث عن صديق

فكرته تايه قلت أسعده

أو حتى أعرف هو مين

مسكت إيدة وقلت له قول يا حبيبي إنت ابن مين

قال أنا ابن مصر

ابن التاريخ ابن السنين ابن الحضارة

أنا ابن أحمس بالأمارة

 ابن توت عنخ امون

ابن الفنون ابن العمارة

ابن بناة الأهرمات

اوعى تقول ده تاريخ ومات

أنا هفضل أجمع فى اللي فات

أنا لسة عايش واللي خلف

قال الحكيم انه ما مات

يا ابنى مقصدش الكلام ده

قصدى إنت .إنت ابن مين

قال أنا ابن مصر

أنا ابن نهر النيل

وعندي ليك مليون دليل

بص لوني .لوني قمحي

حس شكلى وشوف ملامحي

ده أنا كل ذرة في جسمي بتقول إني مصري

طب يلا قول اسمك يا غالي

ولا بتقول الراجل ده ماله ومالي

طب تيجي أعتبرك أخويا

أو حتى عيل من عيالي

يلا قول اسمك ياغالي

بص ركز وإنت تعرف أنا ابن مين

ابن العرب والمسلمبن

ابن صلاح الدين

 اللي كان يصرخ بصوته

يهد عزم المعتدين

وكان يقول الله أكبر

الله أكبر فى وش كل الظالمين

كان بيفطر حب دينه

وانت تفطر بالمنين

كان بيتغدى إيمان مع اليقين

كان بيحلم إنه بكرة يموت شهيد

كانت إرادتة من حديد

كان لما يسمع بالمعارك من بعيد

يشيل كتابه ويا سيفه

وكان يبان بأسة الشديد

قربت تعرف انا ابن مين

ابن بلال بن رباح

ابن الى كان ييجي عليه الليل ما يستنى الصباح

ابن الى على ايده غرور الظالمين ولى وراح

انا ابن سيف الدين قطز

الى بإيمانه وبيقينه على التتار خلاه انتصر

وفي عين جالوت سبلنا اعظم اثر

كان العدو لما بيسمع صوت حصانه بينكسر

ولا أقول لك. مش مهم انا ابن مين

المهم انا ابقى مين

لو بتحلم ابقى حاجة زيهم

علمنى حاجة من صفاتهم

وإني ابقى واحد منهم

علمني اقول الحق مخشاش الديابة

علمني ارجع حق مغصوب مالغلابة

علمني ان ده وطن

مش اننا عايشين في غابة

علمنى إن ده وطن

مش اننا عايشين في غابة

علمنى إن ده وطن

مش إننا عايشين في غابة