حبيبتي يا مصر ياغالية عليا بقلم مصطفى سبتة

لما انا جيت من حبه كتار كله فرحلى و قال يا نهار
قشطه يا عم البليه حتلعب بطل ترفض بقا يا حمار
قاعد هنا بتهبب ايه ده الفول بقا بالخمسه جنيه
و الاحوال علطول ف النازل اسعى و سيب الرزق عليه
طب يا جماعه سيبونى يومين بس افكر
مش سايبين ماهو يا تسافر حتما لزما
يا نوديك جنب المجانين قولوا القصد لميت حالى
وسبت عيالى ودعت امى و عمى و خالى
حتى اصحابى بسرعه اتلمواو حتوحشنا والله ياغالى
هما يدوب كام ساعه و كنت ف عالم تانى
ارض بتلمع
ومفيش دوشه تسد ودانى ذوق و شياكه
و حاجه الاجه و عيشه السطه
و ايام بيك عماله بتجرى .. يوم ف التانى
جوه الشغل و جوه المول شامم بارفان
و لقيت هنا اصناف مفتخره م النسوان
وانا فى الاول ماشى وفاتح عينى و بقى
زى صعيدى خدوه من جرجا على لبنان
وفاتوا شهور
زى التور مربوط فى الساقيه و بيك بتدور
و العلاقات بهتانه و جافه و مفيهاش نور
ايوة صحيح بتجيب ف فلوس و تعيش و تحول
لكن روحك زى تمام الارض البور
لو مليون فدان او اكتر
بس لا فيها حياه ولا فيها عطر زهورمصر يا ناس
مصر صلاة الجمعه و تراتيل القداس
تبعت للجار صحن عاشورة يرجعلك مليان قلقاس
مصر النكته لما تقولها يضحك ليها كل الناس
مصر الدمعه اللى تنزلها تحضنك الحارة و تتباس
مصر تقول الاه حتلاقى مليون ايد تتمد تشيلك
و ان حسيت بالبرد فى ازمه تلقى دفاهم يصلب حيلك
مصر القهوة و صوت الطاوله و حجر الشيشه
مصر قلوب لساها بتضحك رغم العيشه
مصر العشرة و عضم التربه و سابع جار
بنت الحته وصاحب صاحبه و ابن الكار
مصر اتفضل و اشرب قهوة و لقمة هنيه
مصر اللى انت فى عز الكرب واخدها هزار
مصر السهرة الصباحى و غناوى الست
مصر شنوده و شعراوى و قناة التت
مصر زويل و نجيب محفوظ و العب يا صلاح
مصر الضحكة اللى تسرسع و اتلمى يابت
مصر الجارة اللى بتدعيلى فى الثانويه
مصر الصاحب اللى بيستر على بلاويا
مصر التوكتوك و المرسيدس و الحنطور
مصر الشارع بيقوم واقف
لو مرة جنازة معديه
مصر بكل عبلها مفيش فى جمالها اتنين
من اسوان لمقام البدوى لراس التين
100 مليون صاحب و قريب والايد فى الايد
وقت الجد ما يفرق بينهم لون ولا دين
مصر يا غاليه
مهما بعدت حتفضلى ساكنه جوه عيونى
حافضل طفل بحن لصدرك لو فطمونى
حافضل عاشق كل عيوبك قبل محاسنك
روحى تهون و لكنك ابدا يوم ما تهونى
و اختم قولى بكلمه وطالعه بشوق من قلبى
يا اهلى و ناسى و كل اصحابى وكل حبايبى