شاعر من وطنى ( علاء هشام ) اعداد وحوار حمدى احمد

اعزائى متابعى لقاء شاعر من وطنى اهلا بكم مجددا فى لقاء شاعر من وطنى شاعرنا اليوم شاعر شاب فى بدايه مشواره الابداعى يحمل كريزما معبره تجعلك تدخل معه وتتعايش مع قصيدته وهو يلقيها لديه موهبه الالقاء
شاعر اليوم ابن الصعيد علاء هشام

*_*فى بدايه القاء نرحب بشاعرنا الشاب

اهلا بحضرتك استاذ حمدي
انا فخور جدا بلقاء حضرتك
..........
*_* ممكن تعرف نفسك للقراء ؟
انا اسمي علاء هشام من محافظه المنيا مركز ديرمواس
انسان عادي جدا بحب الشعر لدرجه متتوصفش وكان حلم حياتي حد يسمعني
..........
*_* كيف ومتى بدات مسيره علاء هشام الابداعيه ؟
والله انا حياتي بدات وانا ف الاعداديه كنت دايما بحب النصوص اللي ف اللغه العربيه للشاعر احمد شوقي والشاعر حافظ ابراهيم
كنت حاسس بشي جوايا غريب بيدفعني لحب النصوص دي لحد اما كتبت قصيده عن ثورة 25 يناير الا حد ما كانت كويسه لان عقلي وفكري كانو لسه صغيرين
ومن هنا بقا عرفت اني عندي الموهبه
لاكن كتاباتي مظهرتش غير خلال الايام دي
لما حبيت اوصل موهبتي للناس
........
*_* اقرب قصيده من قصائدك الى قلبك ؟
اقرب قصيده لى قلبي هي نهايه ممله لاني وانا بكتبها كنت حاسس كل كلمه طالعه من جوايا ومعظم القصيده كانت عن تجربه
نهايه ممله ..
كانت راسمه حياه بينا
وتفاصيلها بتشبهنا
كتبت ف حبها قصه
سطورها خيوط تتوهنا
بقيت حد لها وقت الجد
وقلبي اتمد ل عيونها
بيمسع دمعه جت ع الخد
لاني بجد مجنونها
ماسك فيها بحضن اليد
حنين يشتد ف احضنها
ومن اول طريق بينا
لقيت فيه الجراح مشدود
وحضن بيتولد جوه وحب مالوش
ف عشقي حدود
كاني طفل ف اللفه يادوب لسة
حالا مولود
وشعري وغزلي وغرامي بكيت فيهم
بكام كلمه اتخلق فيها الوعود لاكن
قلوبنا بلفه تبكيهم
وطرف الخيط كمان قاسي
ف لحظه اتخان صبح مشدود
كاني كمانجا بتلحن
حنين نابع كيان ممدود
وف الشارع بقيت بمشي عيون ساكنه
دموع شمسي
ووقت م احس بالحرقه
اشوفها جمبي وبتمشي
وبتطبطب وبتساند وبتصبرني ع الفرقه
لانها جايه بخايلها تقولي بجد متخافشي
وانا بمشي ..
انا حاسه باحساسك وبجروح الغرام داسك
وتناهيدك ف وقت الصمت
ف عز الكبت ف لحظه شوق دايب فيها
دموع ليا منشفتشي
وحاسه كمان بتنهيدتك وصوت بنتك
وحنين بيموت عشان سبتك
انا فعلا نهيت كل اللي كان بينا
لكني برضو منستشي
منستشي حنانك لما بكوني
وجودك جمبي خلاني
اقاسي لما نسيوني
لحد القلب م استقوي
ع كل اللي حبوني
وكنت انت ضحيه غدر من نفسي
مابين نفسي
وكان نفسي اكون وياك
اكون سنداك
لاكن قسوه حنين نفسي
كانت منعاني ابقي معاك
عشان مظلمش قصه حب
تكون قله
وتكتبلي قصايد غدر ..
تشوف فيا الحياه ممله
وتدعي عليا ليله القدر
مع انك متعرفش ان نا فاكراك
وفاكره كل ذكره معاك
ورسايل كنت تكتبها عشان بلقاك
ولمسه ايد بتحضني وانا وياك
ياريتني كنت مت ف يوم
وسبت قلبي يستناك
وممشتشي
ياريتك كنتي سبتيني م الاول
وقبل الحب اللي جوايا م يتحول
ل حاله عشق
وقبل القلب م يعاني ب لحظه جرح
وينسي الفرح
ويبكي الدم وريح الهم يسرقني
ونار الحزن تجمع طرح
وحساباتي بتتلخبط وتقسمنا
وتنزل ضرب
عشان يطلع ناتج حبك
دماء مني ف لحظه حرب
..........
*_* كم عدد القصائد التى كتبتها ؟
معرفش كام قصيده بالظبط لان زي ما قولت ل حضرتك كتاباتي كانت لنفسي وبين نفسي ف مكنتش بهتم بيهم لان مكنتش مستوعب ولا مصدق اني هكون مع حضرتك النهارده وتظهر موهبتي للنور بس ده ميمنعش اني كاتب قصائد كتيره وقريب جدا هقول العدد لحضرتك
.........
*_* لمن يقرا علاء هشام ؟
بقرأ للشاعر عبد الرحمن الابنودي والشاعر هشام الجخ وبعض شعراء عندي ع الايميل الخاص بيا
.........
*_* قصيده قراتها وتمنيت ان تكون لك ؟

قصيده ل هشام الجخ بعنوان يابحر
لانها فيها احساس قوي جدا جدا
وواقع مرير تقمص دوره الشاعر وفجر كل الالهام فيها
...........
*_* ما هو اجمل تعليق كتب لك ردا على قصيده نشرتها ؟
اجمل تعليق بالنسبالي كان من الشاعر شرين سعد احمد
شاعرة جنوب الوادي
حيمما كتبت لي تحت اول عمل تشاهده
ليك مستقبل واعد وهتبقي من اكبر الشعراء ف مصر
ده بالنسبالي اجمل تعليق وزرعت فيا روح الموهبه من جديد
..........
*_*’ امنيات وطموحات علاء هشام ؟
نفسي اوصل موهبتي للناس نفسي لما اقول شعر اقوله قدام جمهور كبير اوي نفسي ف ديوان بأسمي
مش لاجل الشهره او الماديات بل لاجل الاستمتاع باعمالي
.........
*_* من هم الشعراء الذى يتابعهم علاء هشام ؟
الشاعرة شرين سعد احمد
والشاعرة رضا عبد المطلب
والشاعر جمال سعد
بجانب للشاعر ياسر طنطاوي
والشاعر معتز عبد الموجود
وف شعراء تانيه لا اتذكر اسمائهم لاكني اعجبت باعمالهم
.........
*_* مع علاء هشام ورقه سيكتب بها رساله ماهى الرساله ولمن ترسلها ؟
هي ممكن تكون ورقه واحده بس هرسلها لاكتر من شخص
هكتبلهم الفاشل اللي كنتم بتحطموه اثبت نفسه علي الساحه الادبيه وبقي من اهم الشعراء اللي الناس بتحب تسمعها
ودي هبعتها لكل حد وقف ف طريقي وقال عليا اني فاشل
.......
*_* لو تقابلت مع شاعر كبير ماهو السؤال الى تسئله له وما هى النصيحه التى تطلبها منه ؟
اول سوال هساله هيكون هو ليه اعلامنا لما بيحب ينحج حد فاشل بينجحه ودافن مواهب كتيره اوي تستحق الشهره ؟؟
اما النصيحه اللي حابب اسمعها منه ف هتكون ع مستوايا كشاعر
هقوله انصحني نصيحه ابقي اقوي من كده
واكون عند حسن حظ محبين علاء الشاعر
.......
*_* امنيات وطموحات علاء هشام ؟
بتمني ان ربنا يشفيني اولا لاني تعرضت لحادث وانا بأدي خدمتي العسكريه ادي اللي عمليه شرايح ومسامير ف قدمي اليمني
وتاني امنيه نفسي ف حوار تلفزيوني مع احدي القنوات المشهورة عشان اوصل موهبتي للعالم كله.
.........
وفى ختام القاء نشكر شاعرنا الشاب علاء هشام
انا اللي بشكر حضرتك يا استاذ حمدي ع اهتمامك الفياض بيا وعلي وقفتك جمبي اللي عمري ما هنساها
وبشكر كل العاملين بالجريده