صدمة لأولياء الأمور بعد قرارات وزير التربية والتعليم

كتبت مايسة محمد

كلنا سمعنا المؤتمر الصحفي لوزير التربية والتعليم الدكتور طارق شوقي وأحب أن أسأل السيد الوزير
إيه المصلحة الوحيدة اللي هيكتسبها طالب الشهادة الإعدادية لما تترحل امتحانات الترم الأول لآخر السنة
طالب الشهادة الإعدادية اللي كان بيجيب ١٠٠ من ١٤٠ في الترم الأول بيقدر يعوض في الترم التاني حضرتك ليه تخللي امتحاناته من فرصة واحدة
طالب الشهادة الإعدادية بينه وبينك عقد من ساعة ما دخل ٣ إعدادي إن عنده تيرم أول منتهي بامتحانات، وترم تاني منتهي بامتحانات، بأي منطق يتم دمج الترمين بامتحان واحد ومنهج كامل للترمين
طالب الشهادة الإعدادية اللي عنده ١٣ سنة. ازاي يتحمل ذهنيا ونفسيا منهج سنة كاملة يمتحن فيه آخر السنة ومطالب يتحمل كل الضغوط دي وهو في السن ده
حضرتك ليه بتنزل طالب أولى ثانوي للجان الامتحانات وخايف على طالب الشهادة الإعدادية أليس من الأولى طالب الإعدادية هو اللي يكون له أولوية في الوقوف جنبه طالب أولى ثانوي في عام نقل وكده كده بينجح واحنا عارفين كده مين يافندم أولى بالنزول دي الوقت وحسم مصيره مراعاة لكونه طالب شهادة
هل طالب الشهادة الإعدادية له ذنب في وباء كورونا علشان يتعاقب بتأجيل امتحاناته لنهاية السنة ويكون مضطر رغما عنه يدخل امتحان من فرصة واحدة بمنهج دراسي كامل
إعادة دراسة قرار متحفظ عليه مش عيب أبدا، بالعكس ده قمة التحضر والمسئولية والرقي، بس التمسك بقرار مرفوض من الأغلبية، هو قمة الخطأ