عفيفى عبد الحميد يحاور بائع الترمس ... عم محمود : لا نأكل اللحمة إلا فى عيد الأضحى

كل شهر نطبخ فرخة يأكلها 7 افراد و أنام فى المسجد منذ 20 سنة

بعد مرور خمس سنوات على مرور الثورة المصرية ربح منها من ربح و خسر منها من خسر . إلا أننا فى هذا الحوار لا يعنينا كثيرا من ربح بقدر ما يعنينا الفقراء . الذين إزدادوا فقرا و لم ينالهم من الثورة إلا الخوف و الهلع و زيادة فى اليأس وحرارة السمش فى عز الصيف وبرودة الجو فى عز الشتاء . فلم يجدوا مسئولا يقيهم حرارة الشمس و لا برد الشتاء و من هؤلاء المطحونين الذين سقطوا من حسابات الدولة

عم محمود ( بائع الترمس ) الذى يقف بجوار مستشفى الزهراء الجامعى بالقاهرة ليحصل على رزقه متوكلا على الله . فيقول

أنا إسمى محمود عبد الله محمد عوض من محافظة الاسماعلية مركز فايد قرية فنارة البر الغربى .

عم محمود عندك كام سنة ؟ أنا عندى 42 سنة

هل أنت متزوج ؟ أيوه يا استاذ أنا متزوج و عندى 5 أبناء و بنات اثنين منهم صغار و اثنين فى التعليم و الولد الكبير خرج من المدرسة .

ليه خرجت الكبير من المدرسة ؟

أنا زى ما أنت شايف بائع ترمس و الحياة صعبة و ليس لى أى دخل لا قطاع خاص و لا قطاع عام فكان لازم يكون هناك ضحية من أولادى لكى يعيننى على الحياة و يعيش الباقى .

هل تسافر كل يوم من القاهرة الى الإسماعلية ؟ لا أنا اسافر كل شهر أو كل شهرين حسب الظروف ما تسمح .

هل اسرتك تقيم معك فى القاهرة ؟ لا طبعا . كيف تعيش معى اسرتى هنا . هو أنا قادر استأجر حجرة فى القاهرة علشان يكونوا  معى أنا لا أستطيع دفع إيجار حجرة أنا نفسى تكون اسرتى معى و نعيش زى أى اسرة و لكن كيف يتحقق هذا الحلم .

و أين تعيش لما أنت مش قادر تؤجر حجرة ؟

بعد ما أخلص شغلى أنام فى هذا المسجد الذى أمامك .

يعنى انت ليس لك أى سكن هنا ؟ انا لا أستطيع دفع الاجرة . أنا ممكن أنام فى اى مكان .

أنت موجود هنا تبيع الترمس من كام سنة ؟ يا استاذ انا هنا من 20 سنة تقريبا وزى ما قلت لحضرتك أذهب كل ما الظروف تتيح لى إلى أولادى .

أنت بتعمل كم كيلوا ترمس فى اليوم ؟

أنا بأعمل كل يوم من 3 الى 5 كيلو .

كم ثمن كيس الترمس ؟ ثمن الكيس جنيه .

عم محمود إحكى لى يومك من الصباح الى نهاية اليوم ؟

أنا أقوم من النوم أصلى و ابدء فى تجهيز الشغل و تحضير الترمس و تنظيف عربية الترمس و املأ القلل و انظف المكان الذى أقف فيه و أنتظر رزقى من الله و أظل موجود من الصبح حتى يخلص الترمس و بعد صلاة العشاء أذهب الى المسجد لكى أنام لأننى أكون متعب جدا من الوقوف طوال النهار .

ماذا تأكل فى الوجبات الثلاث ؟

الصبح طبعا طبق الفول و طبق سلطة و رغفين

بكام ؟

ثمنهم 5 جنية

و الغداء بيكون طبق كشرى بثلاثة جنيهات .

طيب و العشاء ؟

والله يا استاذ أنا فى أغلب الوقت لا آكل فى العشاء ( ما بتعشاش )

أنت دخلك كام فى اليوم من بيع الترمس ؟

و الله دا رزق ربنا كل يوم بيختلف عن الآخر ممكن 50 جنية فى اليوم و ممكن 30 جنية حسب رزق ربنا .

هل انت مدخن ؟ نعم

يعنى بعد مصاريفك كم تبقى لأولادك ليعيشوا به ؟

أنت ممكن تحسبها يا استاذ . يعنى لو هانفترض جدلا أن انا بأبيع كل يوم ب 50 جنية . نخصم منهم مصارف أكل حوالى 10 جنية و علبة سجاير 10 جنية و ايجار عربية الترمس 15 جنية يبقى 35 جنية الباقى 15 جنية .

15 جنية فى اليوم على 6 اشخاص و أنت معاهم كفاية يعنى الفرد مصاريفة 230 قرش أكل و لبس و علاج و مدرسة ؟ لا يا استاذ ما انا ابنى شغال و بيأخذ 20 جنية فى اليوم يعنى إجمالى الدخل انا و ابنى فى اليوم 35 جنية فى اليوم .

يعنى دخلك 1050 فى الشهر موزعة على 7 اشخاص .

طيب اسرتك عايشه ازاى و بتأكل ايه فى اليوم ؟

الله اسرتى عايشه فى قرية ريفية و بيقضى اليوم زى ما ربنا يريد ممكن يفطروا حتة جبنة أو شوية مش وممكن يتغدوا شوية رز و اللى ربنا بييسر بيه . وسكت عم محمود دقائق و هو يحبس الدموع فى عينية ثم قال أقسم بالله بأستلف الأجرة و أنا راجع من البلد . وثمن البضاعة بأستلفها من الناس اللى يعرفونى فى الشارع هنا .

بتأكل لحمة كل كام يوم ؟

إبتسم عم محمود وقال والله أنا لا أشترى لحمة أبدا .

ليه؟

منين يا استاذ هو أنا أقدر أشترى كيلو لحمة . والله العظيم أنا وأسرتى لا نأكل اللحمة إلا فى عيد الأضحى .لما الناس بيضحوا بعض الناس يبعتوا للبيت كيس فيه نصف كيلولحمة . هى دى المرة الوحيدة اللى بنأكل فيها لحمة طوال السنة . والله العظيم ساعات يجى العيد الكبير و لا نجد شىء نطبخة . و أولادى محرومين من كل حاجة .

طيب و الفراخ ؟ لسه مراتى متصلين بى علشان عايزين يجيبوا فرخة . قلت لهم هاتوا فرخة شكك من الست اللى بتبيع الفراخ و لما آجى أديها ثمنها . الست دى محترمة ممكن تبيع لنا الفرخة و لما ربنا يفرجها أبعت لها ثمنها .

يعنى أما تحب تأكل فراخ مع اسرتك تتكلف كام ؟

بتتكلف حوالى 70 جنية علشان بأجيب فرخة 2 كيلو علشان تقضينا إحنا 7 افراد كل واحد بيأخذ حتة و كيلو رز و بطاطس .

الأكلة دى بتكون غالية عليك ؟ دى بتعمل لى أزمة  فى المصاريف و ممكن تحصل كل شهر أو كل شهرين علشان العيال .

زوجتك لا تربى طيور فى المنزل ؟

لا يا استاذ إحنا ما نقدرش .

ليه ؟ علشان صاحب البيت مانع إن إحنا نربى أى طيور فى المنزل علشان الريحة ؟

أنت بيتك مش ملكك ؟ يا ريت نفسى يكون عندى شقة تجمعنى أنا و أولادى .

لماذا لم تقدم على شقة فى محافظتك ؟ أنا تقدمت بالفعل قبل الثورة و نزل إسمى أول إسم و بعد ما نزل إسمى مديرة الشئون الإجتماعية  فى البلد قالت لى إسمك ما نزلش و حاولت كثير وحتى الأن لم أحصل على الشقة .

وزارة الاسكان طرحت اليومين دول 500 الف شقة هل تقدمت للحصول على شقة ؟

 منين يا استاذ أجيب 9000 جنية يا ريت معايا .

هل لك أى دخل أو معاش من أى جهة ؟ لا و الله حاولت عمل معاش لأننى لا أعمل و جبت تقرير طبى بيقول اننى عملت 4 عمليات . عمولها لى حالة ملحة ( نظام مساعدات ) و إدونى معاش 200 جنية و بعد 3 شهور إنقطع مش عارف ليه .

عم محمود إنت نفسك فى إيه ؟

أنا نفسى فى شقة بس تلمنى أنا و عيالى و كشك أعيش منه لأن صاحب البيت لو باع البيت اللى أنا مأجرة و الله العظيم هاتشرد أنا و أولادى .

ليه انت مش معاك عقد ؟ لامفيش اى عقد

و مع ذلك اقسم بالله انه ما ينفع تربى فيه مواشى .

و أخيرا سكت عم محمود من الكلام و إنهمرت الدموع من عينيه حزنا على حاله و الحالة المزرية التى يعيشها هو و اسرته و ظل يردد لىّ الله و لم نتركه حتى سكت من البكاء إلا أنه لم يستطيع إكمال باقى الحوار