عكس كل اللي شايفني

انا عكس كل اللي شايفني

باظهر قوي وساعات أشد

واخبي جرحي جوة مني

وانا والجراح ما بنا وعد

ان غيبت عنها تشتاق لي زي اي صديق

وف عز فرحي تندهلي وتبان لي ف كل طريق

والاقي سكتي مفروشة بالجراح ويارب قويني عليها

مفيش فاصل عشان ارتاح ودمعتي سنين باداريها

وان شافني حد ساعتها اكيد مش هيعرفني

انا من جوة حاجة غير اللي بتبان برة

بالف وش سعيد تشوفني

ولو شفت دموعي مرة

تدعيلي يارب عيني

وباعمل اني جامد وباداري كتير أحزاني

وانا ف الحقيقة واحد اتخلق الجرح عشاني

واللي ما يعرفوش فالوا سعيد متهني

وبادور ف الوشوش علي حد بجد عارفني