كلمتين بالبلدي كده

بقلم : حماده عبد الجليل خشبه 

احنا حاربنا في 73 وحررنا سينا الحمد لله وكنا بنفكر في حل القضيه الفلسطينيه لكن للاسف الشديد العرب ما تعاونوش مع السادات وقتها
لحد موصلنا للوضع اللي احنا فيه .
المهم في سنة 2005 اسرائيل حاولت أنها تضيع القضية الفلسطينيه بتهجير اهل فلسطين علي سينا وعلي الاردن لكن حسني مبارك رفض .
لو لاحظت الخريطه هتلاقي مساحة فلسطين  27 الف كيلوا اسرائيل احتلت 20 الف كيلوا والباقي عايش علي 7 آلاف كيلوا 
متقسمين على أهل الضفه وقطاع غزه يعني ببساطه ان اسرائيل عايزه تدحلب علشان تخلص القضية الفلسطينيه ودا اللي بتعمل دلوقت .
المهم اهل الضفه ناس مسالمين وناس كويسين وناس عايزه تعيش وتاكل وتشرب وخلاص  واسرائيل شغاله هناك هدم بيوت وبناء مستوطنات ملهاش علاقه بحاجه  ،قطاع غزه بقى هو اللي فيه المشكله كلها ودا موضوع ثاني ،  قطاع غزه يسكنه فصيل فلسطيني  بين قوسين  اخوان فلسطين فيهم بقه اللي بيسموا نفسهم الحركات الجهاديه لو قلنا يعني ايه اخوان ، هعرفك يعني ايه اخوان ، لو رجعتك للخلف في 2011 واللي عملوه في مصر وسينا والإرهاب اللي كان شغال  ، كده عرفنا يعني ايه اخوان ، اخوان مصر ميفرقوش كتير عن اخوان فلسطين ، ودا شفناه في 2012 لما بدأ يخشوا ويتعاونوا مع بعض ويهددوا الجيش المصري في سيناء .

معلش هرجعك للخلف شويه ، اسرائيل فكرت وقالت احنا عايزين نزحلق الناس دول على سينا ونعمل مشكله لمصر .فكرت اسرائيل سنه 2005 انشاء ولايه اسلاميه في سيناء .
جه واحد قائد اسرائيلي وقال لرئيس الوزراء وقتها شارون وقال له احنا ممكن نجمع الفصائل الجهادية اللي في فلسطين في قطاع غزه ونرميهم علي مصر .

وبالفعل انسحب شارون من قطاع غزه وبدأت الفصائل الفلسطينيه تحتفل وتعتبر أن دا انتصار للمقاومة الفلسطينيه وهما بيحتفلوا قامت اسرائيل بغلق الجدار العازل عليهم وحبستهم في قطاع غزه يعني من 17 سنه وهما محاصرين داخل الجدار العازل .

وبدأ يضربوا فيهم من الشمال وفي 2008 كسروا الحدود ودخلوا علي سينا ورفض مبارك ورجعهم مره اخري الي غزه وبدات امريكا تتكلم مع مبارك عن صفقه القرن انت ليه متحدش الفلسطينيين  وحتت الارض اللي هم هيعيشوا عليها في سيناء هنديك غيرها في صحراء النقب ، وتم إغرائة بمكاسب كبيره لمصر ، رفض العرض الرئيس حسني مبارك وقال إن دا تفريغ وتصفية للقضية الفلسطينيه .

بدأت امريكا واسرائيل في التخلص من حسني مبارك واتشال مبارك في ثورة 2011 وجات الإخوان وطبعا الإخوان دول مرحبين اساسا بوجود غزه علشان طبعا غزه فيها حماس ومش حماس فقط دول حوال 17 فصيل جهادي ولا تفرق معاهم مصر ولا فلسطين علشان مش بيعترفوا بوطن اساسا ، اللي بيعترفوا بيه هي دولتهم فقط وهي الولايه اسلاميه زي اللي كانوا عايزين يعملوها في سينا وهما في الحكم .

المهم طبعا أثناء حكم الإخوان كانت العلاقات وطيده جدا بين الاخوان في مصر والفصائل الجهادية في فلسطين ودخلت الفصائل دي سينا وطبعا حماس علي رأسهم .

لحد ما أدرك الشعب المصري أن الإخوان فعلا عايزين يبيعوا البلد وعملوا ثوره 30 يوليو واتشالت الإخوان من الحكم وطبعا احنا شفنا اللي اتعمل والإرهاب اللي مصر كانت فيه اثناء وبعد حكمهم لمصر وطبعا الفضل كله يرجع لربنا سبحانه وتعالي ودهاء المخابرات المصرية بنوعيها وحكمة وجراءه وزير الدفاع وقتها القائد العام للقوات المسلحه الفريق عبد الفتاح السيسي  .

وفضلت حماس تضرب وتحرق وتدمر في مؤسسات الدوله المصرية وتقتل الجنود في سيناء ، ومن وقتها ومصر قدمت 4000 شهيد خلال ال10 سنوات السابقه ، اظن كده عرفت يعني ايه اخوان .

المهم الحمد لله نجحنا في بتر الإرهاب من سينا وبوظنا خطة اسرئيل وامريكا في الوقت دا ، تخيل معايا لو فشلت مصر في بتر جذور الإرهاب كان ممكن يحصل ايه ، كان هتكون كل الفصائل الارهابيه من بقايا داعش وخلافه كانت هتكون موجوده في سينا وتبدأ الحرب علي مصر بهدف أن فيها ارهاب .

المخطط دا بدأت اسرائيل تنفذوا بمساعدة حماس وانا من وجهة نظري وتحليلي  أن في اتفاق بين اسرائيل وحماس علي ما تم من شن الهجمات الحمساوية علي المستوطنين الاسرائيليين في 7 اكتوبر  ودا فلم هم ساهموا في  إخراجه .

وباختصار كده لو صعب علي الإخوان خراب مصر وتدميرها في  2011 حتي الآن ، يبقي هيصعب علي حماس تدمير غزه  حماس ولا يفرق معاها قطاع غزه ولا الشعب الفلسطيني.

اللي يفرق معاهم هو التعاطف الدولي والضغط علي الرئيس السيسي والجيش المصري لدخولهم ارض سينا ، وبكده يكون الحركه واسرائيل حققو  المخطط بتاعهم  اللي كان واقف من 2011 لحد دلوقت وهي إقامة ولايه اسلاميه في سينا ، ومن مخطط اسرائيل اعتبار سيناء منطقه ارهابيه لتجمع ارهاب العالم فيها .

بس طبعا لا شعب مصر ولا رئيس مصر ولا جيش مصر هيسمحوا باي فصيل أنه يخترق الحدود المصرية ،ولا هيسمح باي فصيل غزاوي بالاستيطان في أرض سيناء الحبيبه .

حفظ الله مصر شعبها ورئيسها .
وحفظ الله شعب فلسطين من الكيان الصهيوني والكيان الإرهابي