كله بيضحك على كله

محمد عبد المنعم

كله بيضحك على كله والضرب ف المليان

والكل يبان على اصله ف الشدة الناس بتبان

اللي بالف وش

واللي استاذ ف الغش

واللي الغدر هوايته وف الندالة معلم

وف سكة الخيانة استاذ منه تتعلم

يا صاحبي اسمعها منى

انا لو هاتكلم عنى

هاقول يا صاحبي اني

مش لاقي روحي معاهم وماليش بينهم مكان

كله بيقول وانا مالى والطيبة ضاعت ف الزحمة

ومين اتهز لحالى ولا ف قلبه رحمة

برة انا ليه غير جوة

على بعض ليه بنستقوى

اللي بعمري اشتريتهم يا قلبي خلاص باعونا

كنا بنعلى فيهم وهما بينزلونا

اللي فوق كتافك

طلعوا مين فيهم شافك

ناسيين حتى اوصافك

ويدوب انت ف نظرهم ماضي وعدى وكان

يا قلبي الزمان ده القسوة هي قانونه

الكل بيحترمها وعايش بيها سنينه

واللي عايش بقلبه حاسس انه غريب

الدنيا جاية عليه وضربتها بتصيب

والسكة مفروشة له يا عيني بالف جرح

ولا يتجرأ ف مرة يحلم بلحظة فرح

الوضع كله اختلط

الصح شبه الغلط

وحياتنا زي عقد حباته بتتفرط

والله يعوض علينا موتوا فينا الانسان

كله بيضحك على كله