يازماني ليه مخاصمني بقلم مصطفى سبتة

مخاصمني يا زماني ليه
ف طريق مهجور طويل
دايما تكوي ف جروحي
و ابات مكسور عليل
مخاصمني و لسه فاكر
مين باعني و ليا ناكر
بحلم دايما و اصدق
الاقيك مدتلي ايدك
و القي حضنك يساعني
و يكون نبضي ف وريدك
و سنيني بتستخبي
في زمان قادر و غادر
يا زماني عديت هوايلو
مشيت ع الجسر حافي
بتزيد و انا عودي مايل
بزيادة انا حملي كافي
ايام بتفوت عليا بسنين
جارحة و طويلة
تندهلي دموع عنيا
فين ايامنا الجميلة
و الصبر المستخبي
بيشيل احزان في قلبي
مكتوبلي دايما اخبي
احزاني المستحيلة
امتي هاشوفك يا بكره
تيجي تطيب جروحي
ياما نفسي ما تبقي ذكري
و تقول لسنيني روحي
بتمني فيك يا بكره
تمسح دمعة زماني
امتي هاتيجي يا بكرة
ايامي مورياني