خبير الموارد البشرية مصطفى حسين اعرف نفسك وشغفك بالمجال اول خطوة للنجاح

حوار محمد محسن

قضية تدريب وتاهيل الشباب اهم مايشغل بال كل خريج فى طريقه للبحث عن الوظائف لذلك كان حوارنا مع خبير الموارد البشرية مصطفى حسين الشهير بالريكورتر مصطفى مهتم بمجال التدريب والتوظيف ويقوم بعمل تدريبات مجانية للشباب ويساعدهم فى ايجاد الوظائف المناسبة مجانا من باب مساعدة الغير وينشر على صفحته العديد من الوظائف للشباب

كلمنا عن مجال عمللك وخبراتك؟

"مصطفي حسين"

بشتغل مجال في التوظيف والتعيين وادارة الموارد البشرية (HR) لاكتر من 5 سنين، دبلومة في إدارة الموارد البشرية من معهد HRCI الأمريكي.

وحاليا مدير إدارة الموارد البشرية في احدي الشركات المصرية. مهتم بنشر الوظائف وتأهيل وتدريب الشباب لسد الفجوة الموجودة في السوق العمل بين الشركات والباحثين عن الوظايف عامة، وحديثي التخرج بصورة خاصة.

هل يؤثر محتوي التعليم علي مسيرة الانسان ؟

بالتأكيد، طول ما الانسان بيسعي ورا حلم معين لازم يتسلح بالعلم والمعرفة، التعلم بيختصر عليك اشياء كتير وبيزودك الخبرة الكافية اللي هتحتاجها في حياتك العملية او الشخصية. ده لأن اي حاجة بتتعلمها بتغير في تكوين شخصيتك وخبراتك. ومهما وصل مستواك العلمي والمعرفي هتفضل تتعلم ويمكن تتعلم من اللي الناس اللي بتحاضرلهم.

ايه هي رسالتك للطلبة والخريجين الجدد؟

دايما لما حد بيسالني السؤال ده بيبقي ردي واضح اسعي ثم اسعي ثم اسعي.. اغلب الخريجين الجدد بيدور علي الشغل المريح السهل اللي مرتبه كبير!! وده صعب جدا لحد لسه معندوش خبرة.

لازم تدور وتجتهد وتطور نفسك ومهاراتك في المجال اللي هتشتغل فيه واوعي تبص للمرتب في اول 3 سنين في حياتك المهنية، اتعلم وكون خبرة والفلوس هتيجي هتيجي صدقني بس ابني اساس صح في الأول.

ايه افضل الطرق الفعالة للبحث عن وظائف؟

مبدئيا لازم يكون عندك CV معمول بشكل صحيح، الخطوة اللي بعدها لازم تعرف اولا مواقع التوظيف الاونلاين زي :

- لنكيدان linkedin اللي يعتبر شكبة مهنية وعلمية احترافية.

- مواقع wuzuff و فرصنا و jobzella وارزاق وBayet و Glassdoor .

- وطبعا اعلانات التوظيف علي صفحات وجروبات الفسيبوك.

ثانيا: البحث عن الوظائف اوفلاين:

- مكاتب القوي العاملة.

- مؤتمرات التوظيف اللي بتنظمها الجامعات والمؤسسات والجمعيات الخيرية والقوي العاملة.

- اعلانات ونشرات التوظيف الدورية.

ودي بصورة عامة:

""(اغلب الطرق و اكثرها فاعلية)"" .

كلمنا عن كيفية كتابة السيرة الذاتية بشكل صحيح؟

خطوات عمل سيرة ذاتية احترافية بإختصار :

١- فورم علي برنامج ورد باللغة الانجليزية.

٢-خط باللون الاسود.

٣-حجم خط واضح ومقروء

٤-صورة رسمية لو اطلب منك صورة.

5 -عدم كتابة معلومات خاطئة او غير صحيحة.

والترتيب الامثل لل CV هو :

١-الخبرات العملية.

٢- المنح والتدربيات والكورسات.

٣- بياناتك الشخصية.

ازاي اختار المسار الوظيفي المناسب ليا؟

لو محتار ازاي تختار الوظفية المناسبة ليك فــ لازم تجرب اكتر من مجال وكارير بعيدا عن مجال دراستك "من غير كسل".

(ومثال على كده؛ حضرتك لو بتشتري قميص هتلف علي اكتر محل وهتقيس اكتر من قميص لحد ما تلاقي المناسب ليك) .

اشتغل وجرب نفسك في مبيعات، خدمة عملاء، تسويق برمجة أو غيرهم لحد ماتلاقي شغفك واللي بتدور عليه.