خطوة ماكنتش محسوبة

بقلم/نشأت البسيوني 

في لحظة معينة في حياتك بتلاقي نفسك واقف قدام طريق مافكرتش يوم إنك تمشيه طريق جه من غير إعداد ولا خطة ولا ترتيب كأنه ضيف دخل حياتك من غير ما يخبط ولا يستأذن ومع ذلك حسيت إنه جاي يحمل حاجة ليك انت بس الخطوة اللي ماكنتش محسوبة دي ممكن تكون قرار مفاجئ أو كلمة قلتها من غير ما تفكر أو باب اتقفل قدامك فجأة ففتح لك باب تاني 

ماخطرش على بالك والأغرب إنك رغم كل القلق حسيت إنك لأول مرة ماشي في اتجاه يشبهك ساعات الحياة بتاخدك لسكة ماخططتش لها عشان تبعدك عن حاجة كنت متمسك بيها أكتر من اللازم أو تعلمك إنك مش لازم تفهم كل حاجة دلوقتي وإن في تفاصيل ما بتبانش غير لما تهدى وتبص وراك بعد وقت ومع كل خطوة مش محسوبة بتحس إنك بتتعلم حاجة جديدة عن نفسك 

بتكتشف إن القوة مش في إنك تبقى جاهز لكن في إنك تتحرك حتى وانت مش فاهم كل الإجابات القوة في إنك تسمح للقدر يلعب دوره من غير ما تقف ضده وفي نص الطريق تكتشف إن اللي كنت فاكره صدفة كان رسالة وإن اللي كنت شايفه عشوائي كان ترتيب وإن الخسارة اللي وجعتك كانت بداية لمعنى أنت محتاجه عشان تكمل وفي الآخر تدرك إن الخطوات اللي ماخططتش لها هي أكتر 

خطوات غيرت فيك وإن الحياة ساعات بتعرف تختار لك أحسن من اختياراتك وإنك مهما حاولت ترسم طريقك بدقة الطريق الحقيقي بيظهر لما تمشي مش قبل ما تمشي