ديوان متغربين في حضن الوطن الجزء الأول

 تأليف الشاعرة  شروق العليمي 
متابعة / عبدالحفيظ موسى
هحكي حكايه مصري أصيل
 من يومه بيشرب م النيل 
عاش على أرضك ...
ضحى بماله علشان عرضك ..
كان عايش عيشة فلاح..
 ليله كان نوم ونهاره كفاح 
كان دايماً يصحى من النجمه
 يحرث فيكي ويزرع فيكي 
ليخليكي.. شمعه جميله الدنيا بحالها تنور بيكي 
دب الفاس في الأرض وخلي جناينك تطرح لولي وماس
 حصد الخير م الارض
 ووزع منه كمان ع الناس.. 
روح بيته في حضن عياله 
ولا فيش أبدا حاجه في باله
 خير الارض خلاص اهو جاله 
هو ده حاله....
كان عايش مرتاح فرحان.... راضي اكمنه 
بس عشان انسان غلبان ....اخدوها منه 
مش من حقك.... مش من حقك

إزاى تزرع أرض مساكن...؟؟
أرض مساكن....!!! 
قال مش فاهم.....؟؟
أرض أبويا وفيها انا ساكن 
أنا مش سارق 
أنا مش واخد حاجة غيرى 
هى دى أرضي وهو دة خيرى
ياما تعبت سنين وسنين علشان توصل للدرجادي 
كده هتضيعي في غمضه عين طب هعمل ايه انا واولادي.....؟؟
 بس أتاريه بيكلم نفسه وكلامه محدش غيره سامعه 
فين الرحمه ارحموا حسوا
 ده قرار عالي مين هيمانعه
 وادى حكايه مصرى أصيل
 من يومه بيشرب م النيل