نهضة الروح من العتمه

بقلم/نشأت البسيوني 

في لحظة محددة في العمر بتحس انك واقع ومكسور ومحاصر بكل اللي كنت فاكر انه سندك وكل اللي كنت شايفه ثابت بيقع فجأة من غير مقدمات وتحس انك لوحدك في ساحة واسعة مافيهاش بشر مافيهاش صوت غير صوتك اللي متلخبط وصوت قلبك اللي بيحاول يفوق من الصدمة وتحس انك عايز تقوم ومش عارف تقوم ومش قادر تقول الكلام اللي جواك ولا قادر تخبي اللي تعبك

ومع كل لحظة بتعدي تلاقي نفسك بتسأل الاسئلة اللي عمرك ما فكرت فيها ليه بنقع وليه بنقوم وليه بنتمسك بناس ما يستحقوش وليه بنسيب اللي يستاهلوا وليه بنزعل لو حد مشي مع ان ربنا بيشيل من طريقنا كل اللي مش خير لينا وليه ساعات بنتمسك بذكرى بتوجعنا وكأننا بنعاقب نفسنا على ذنب ما عملناهوش
وفي لحظة من غير ما تحس تلاقي الروح بتنهض من تحت الركام 

تنهض من جواك من وجعك من خيبتك من عبء الأيام اللي حملتها سنين تنهض رغم التعب رغم الثقل رغم الشروخ اللي في القلب كأنها بتقول خلاص انتهى زمن الانكسار وبدأ زمن جديد زمن ربنا فيه بيلمك من اول وجديد وبيمسح من قلبك كل اللي وجعك وكل اللي خذلك وكل اللي كسر بقية الطيبة اللي فضلت ماسك فيها
وتلاقي نفسك ماشي في طريق شكله اتغير فجأة طريق مكنتش 

شايفه قبل كده طريق مليان إشارات بتقولك امشي آه طريق صعب ومش مضمون لكن هو الطريق الوحيد اللي هيطلعك من الضلمة اللي كنت غرقان فيها وتلاقي نفسك لأول مرة مش بتهرب من خوفك بالعكس بتواجهه بتقابله وتقول له انا مش ضعيف زي ما كنت فاكر انا كنت تايه بس تايه لحد ما ربنا هداني للباب اللي كنت بدور عليه واللي عمري ما كنت هفتحه لو فضلت واقف في مكاني

وساعات تلاقي نفسك فجأة فاكر كل كلمة وجعتك وكل موقف هزك وكل حد كسرك وتفهم انك ما كنتش محتاجهم ولا كنت محتاج رضاهم ولا كنت محتاج وجودهم لانك ببساطة كنت محتاج نفسك محتاج تقف قدام المرآية وتقول انا كبرت انا اتغيرت انا استوعبت ان مش كل خسارة وجع ومش كل فقدان نهاية ساعات نهاية شيء هي بداية ألف شيء وساعات الوجع اللي كسر ظهرك هو نفسه اللي 

هيبنيك من تاني وفي آخر الليل لما الدنيا تسكت وتبقى انت والليل والفراغ تلاقي نفسك هادي بطريقة غريبة كأن الطوفان اللي جواك هدى كأنك أخيرا فهمت الدرس وفهمت ان ربنا ما بيكسرش حد غير لما يكون ناوي يبنيه من جديد بناء أقوى أنضج أصبر أصدق وأجمد من اللي كان قبل كده ولما أول ضوء يطلع وتبص حواليك وتلاقي انك واقف من تاني من غير ما تفهم ازاي تعرف ان الروح عمرها ما 

بتموت وانها مهما اتكسرت بتنهض ومهما انطفأت بتنور ومهما تعبت بتكمل لانها ببساطة معمولة عشان تقاوم مش عشان تستسلم