وبينكم مودة

سـامـى بـوادى يكـتـب.....

ليس لي  ثمة علاقة بمن يقولون عنهم انه ناشط حقوقي ولا ممن يصفون نفسهم انه مدافع عن حقوق المرأة انا مجرد ابن لأم سهرت ربت وأخ لأخت كبري راعت واهتمت وزوج لزوجة دعمت وتحملت وساندت وأب لأبنة هى قرة عيني ومصباح داري  وزميل لزميلة عمل  اجدها اوقات تنجح وتتفوق علي غيرها من الزملاء ووكيل عن موطنة قدتم سلب حقوقها لاي سبب من الاسباب وخصم لأخري قد تجاوزت وافترت في حق الغير. انا شريك للمرأة في يومي وساعات حياتي  وشهادتي اليوم بكل حيادية عن سابق تعامل ومعرفة ومعايشة
في مجتمعنا عندما يتئزا الرجل نفسيا او عاطفياً في علاقته بزوجته..وتصاحبه الازمات  ويحس بعدم إكتفاء.. جسدي أو نفسي.. يظل متاح له أوبشن أنه يتجوز معاها واحدة تانية.. 

طيب لما الست تحس بعدم إكتفاء عاطفي أو جسدي.. تعمل إيه؟ يتقال لها مش معيّشك في أمان وبيصرف؟ اصبري عشان عيالك... فتدفن نفسها... فتضيع أنوثتها اللي بتتغذى على عواطفها.. وتقصر أكتر في بيتها.. وتتلام على تقصيرها... يعني هى معندهاش أى مخرج زيك أنت!! الا الحصول علي لقب يجده البعض الي الان سبه ونقص وسبيل تقول
 حتى لوالرجل  مخترتش أنه يتجوز تانى كفاية إحساسه أنه يقدر يعوّض النقص اللي بيحس انه عندها.. أنت ليك اليد العليا هنا..  فلو الدنيا زنقت، تتجوز.. ولكن هى لو قررت ده.. هتضطر تعمله بخراب بيتها ..  والست بالنسبة لها لو هتختار بين إحتياجتها واستقرار ولادها.. هتضحى بنفسها... معندهاش بديل!!

عشان كدة الرسول صلى الله عليه وسلم أوصاكم بالنساء خيراً.. وطلب منكم الرفق بهن.. ولقبهن بالقوارير لبيان مدى الرفق المطلوب ..فاتقوا الله في زوجاتكم.. هن أسيرات!! 

انا بشوف كم مشاكل هستيرية.. بسبب الفراغ العاطفي.. بسبب الإحتياج الجسدي... بسبب الخواء النفسي بسبب تجاهل تغذية روحها وقلبها وجسدها.. 

مراتك مش من نوعية الأنعام عشان تقولها كفاية بشتغل وبتعب عشان اجيب لكم أكل وأحافظ على سقف يأويكي!!

 النساء شقائق الرجال... مجتمع بائس اللي يحط على الست جبل من حقوق الراجل .. اللي هو ربنا خلقه أقوى منها عشان يقدر يحتويها وأعطى له درجة زيادة عليها عشان مُطالب بحقوق أكتر... وييجي المجتمع المتشرب قضية امينة رزق وسي السيد يحط عليها أعباء نفسية وجسدية ويخفف عليه أعباؤه تماماً رغم أنها من خصائص رجولته أنه كفؤ يشيل أضعاف أضعاف مراته... لا وكمان معاها تلاتة لو حب... وييجي هو يختزل مجهوده في شغل وصحاب وبس.. ومطلوب منها هى اللي توفي الحقوق وتحتوي وتشيل المسؤولية... عشان هو مضغوط!! 

انا مُقدر ضغط نعاني منه نحن  الرجال.. الزمن صعب فعلاً... بس ده هو ميدان جهادك.. لازم تبقى واعي أن ضغوطك مضيّعش منك حقوق الآخرين عليك!

وخلي بالك هى كدة بتشتغل خارج إطار أنوثتها، راجل وست... والجديد أن حتى العلاقة بين الراجل والست أصبحت من التراث بسبب أنك برضو مضغوط.. طب وبعدين!!! انت ماتعرفش انه كفى بالمرء إثماً.. أن يضيّع من يعول !!
ولكل ست.. أعملي اللي عليكي .. كل واحد فينا بيتحاسب على حقوق الآخر واطلبي منه حقوقك بالأدب.. مش معنى أنه مقصر أنك تتمردي وتتخانقي.. فكريه بإحتياجاتك بأدب  كل فترة.. متستنيش يفهم لوحده... لو فكرتيه مرة واتنين... إلجئى لحد يساعد في حل الأمر  بينكم... بس يكون حد عنده خبرة وعلم بالعلاقات الزوجية.. خدي بالأسباب.. ومتسيبيش نفسك محتقنة.. عشان الفتن لما تقابليها بالنقص اللي عايشاه... وتقعي غصب عنك من كتر ضعفك.. محدش للأسف هيرحمك!
الكلام ده.. مجرد تذكرة للرجال عشان المجتمع طمس حقوق الست النفسية من حب وحنان واحتواء وشعور بالرغبة فيها و الاهتمام باحتياجتها.. فلازم نحيي ونذكر عن تلك الحقوق لأنها باب فتنة عظيم... 

وتذكرة للنساء أنها تفهم أنها لازم تطالب بإحتياجتها .. ومتضيّعش نفسها بالسكوت والكسوف.. 
وشكراً لكل راجل ... عارف مقام رجولته صح.. ربنا يبارك لك في عملك  واسرتك .. رغم ضغوطك.. كفيت ووفيت