ياسمين حافظ تكتب .... "ساكتة ليه"

ساكتة ليه وواقفة مكانك ومابتتكلميش

ساكتة ليه وسايبة كل فاجر بيزيد في فجره فيكي وبيعيش

ساكتة ليه عن الحق وللغلبان دايما تقولي مفيش

ساكتة ليه في زمن الفواحش وأعلنتي سياسة التطنيش

ساكتة ليه وبتشجعي كل اللي عايش فيكي على التلطيش

ساكتة ليه عن كل ظالم ومابتحاسبيش

ساكتة ليه ده الظلم فيكي زاد اكتر ومابينتهيش

عايزة ايه قوليلي اتكلمي .. وبعد كل اللي بيحصل فيكي ده ساكتة ليه عنه وبتستهوني

ساكتة ليه وبقيتي كده على طول لكل فساد بتسهلي

ساكتة ليه وسايباني فيكي بضيع ولو هعيش بعيد عنك بتستحملي وعادي بتكملي

ازاي وأنا حبي ليكي في دمي واكنك أمي وكنت فاكر لو بعدت عنك يوم ممكن تولولي

مالك ليه بقيتي كده وأنتي عارفة اني من غيرك مقدرش أعيش

مالك ليه اتغيرتي كده وأنتي العالم من غيرك مايساويش

قومي فوقي واصحي من غفلتك دي وماتناميش

قومي الحقيني قبل ما أمشي و أمسكي فيا ماتسبنيش

انتي عارفة اني عمري ما اقدر اسيبك ده أنا من غيرك مقدرش أعيش

قومي يا رمز الجمال والخير والدلال يا اللي جمالك عجب مالوش وصف ومايتحكيش

قومي فرحي كل اللي بيحبك و عن الحق ماتسكتيش

قومي بطلتك البهية وارجعي بسحرك العالي ماتستسلميش

قومي احضنيني حضن دافي واحميني من الضياع ده أنا من غيرك مقدرش أعيش